قررنا في بيتنا قرار مهم ومصيري

قررنا في بيتنا قرار مهم ومصيري وصعب..
بعد اجتماع عاجل على ترابيزة السفرة..
بدأت الحكاية لما جت المدام والتكشيرة مستحوذة على تقاطيعها التي لا يليق عليها زعل وقالتلي بقى بص إنت لازم تشوف صرفة مع العيال دي درجاتهم في المدرسة زي الزفت وسلوكهم بقى عجيب وكلامهم غريب واهتماماتهم أغرب وكله بسبب النيلة التيك توك والبلا الأزرق الموبايل اللي مكفيين عليه ليل نهار..
بعد تناول الغدا تنحنحت ورسمت على قورتي ١١١ وفي نبرة استعرتها من طريقة أبويا زمان لما كان يقرر يكشر عن أنيابه قلت 
يقين.. مؤمن ساعدوا ماما في شيل الإطباق وتعالولي عايزكم..
قعدوا التلاتة قصادي بدأت الجلسة بسماع مرافعة الأم قالت شكواها اللي حكيتها لي من شوية.. بصيت للاتنين لقيت يقين كاتمة ضحكة ومؤمن عامل ودن من طين وودن من عجين.. مشكلة لما تدادي زيادة عن اللزوم الدلع ساعات بيبقى ماسخ بس اللي خلاني أنتهج مبدأ المدادية من البداية إني مش بشوفهم أد ما ماماتهم بتشوفهم وهي بتوازن الدنيا شوية أنا أرخي وأهزر وهي ترقع بالصوت وتشد في شعرها.. لكن المرة دي تعبت وسلمتني زمام الأمور فكان لابد أكون حازم..
عليت التون 
أنا لما أتكلم تبصولي وتطرطأوا ودانكم دي..
سوري يا بابا بس يعني إيه نطرطأ
ليه ياختي مولودة في ستوكهولم حضرتك لو مش فاهمة الكلمة فالسياق موضحها بلاش تصيعي عليا أنا.. وإنت يا بيه ما تسايرنيش والسلام وركز في كلامي..
اللي تشوفه يا نجم..
لا اركنلي بقى شغل الألابندا ده على جنب عشان أنا عاوز أتكلم جد والحركات دي مش هتاكل معايا..
بصيت للمدام همستلها عجبتك برقتلي عشان أكمل في الدور..
بقى بصوا بقى يا حلوين درجاتو زي الطين.. حلوين زي الطين حلوة القافية حسيتها هتفك مني تاني ولد بنت ركزوا معايا..
ما إحنا مركزين يا بابا إنت اللي مش مركز..
أنا مش بعمل زي كل الأبهات مش طالب منك إنت وهي درجات معينة مش عايزكم تطلعوا الأوائل كل سنة مفيش ضغوط خالص أهو بس مش معنى كده يا أخ.... اسم الكريم إيه
مؤمن..
مش معنى كده يا أخ مؤ إنك تجيبلي كحكة في الرياضة..
كحكة تقصد الماث..
معلش يا نجم أبوك خريج عمر مكرم الثانوية بنين ما وردش عليه لا ماس ولا فضة.. المهم أنا عايزكم تستمتعوا بالدراسة تذاكروها بحب واللي مش فاهمينه افهموه مش طالب منك ومنها رقم معين توصلوله إحنا مش في البورصة بس اعملوا اللي عليكم.. لا يكلف الله نفسا إلا وسعها.. ووعد ولو إني ما أحبش أربط مصلحتكم بوعود بس نعديها المرة دي وعد لو فقتم من الغيبوبة دي ورجعتم بني آدمين طبيعيين هجيبلكم.... ممممم أجيب إيه مش عارف اللي تطلبوه ساعتها..
طيب يا بابا وإحنا كمان بنوعدك هنرجع
نذاكر تاني..
لا يا حبيبتي مش بس المذاكرة.. أنا قلت ترجعوا بشړ طبيعيين الموبايل اللي مكفيين عليه ليل نهار ده بياخد من صحتكم الجسدية والنفسية بيوريكم عوالم مزيفة مش حقيقية ملهاش هدف غير إنها