إحنا زعلانين.. أنا والمدام والبنتين

دخل علينا شهر رمضان وإحنا زعلانين.. أنا والمدام والبنتين علشان هنقضيه لأول مرة بعيد عن بيتنا اللي عشنا فيها من يوم ما اتجوزنا من تسع سنين.. كنا لسة ناقلين في بيت جديد وما نعرفش أي حد البنات كانوا بيستنوا رمضان قبل كده بفارغ الصبر ويقضوه لعب طول الليل مع صاحباتهم متونسين بأمهاتهم وهم بيدردشوا سوا في البلكونات أو أدام الفرن أيام الكحك والبسكوت والمدام مفتقدة جاراتها العزيزات وقعدات الصفا وأنا برضو اتعودت على صحبة وجيرة وطقوس محببة جدا في الشارع القديم.. بس عملت فيها مش فارق معايا علشان أخفف عنهم وعدتهم إني هخرجهم يوم ويوم نتسحر بره وهفسحهم وإني هصلي معاهم التراويح جماعة ومش نازل لكن كانوا عارفين إنها وعود فالصو هتطبق يوم واتنين ومع تعب الشغل ومفرمة الحياة هتتنسي..
وبعد ما بانت الرؤية واتأكدنا إن رمضان بكرة سهموا وبلموا وقبل ما تقلب محزنة رن جرس بيتنا لأول مرة من ساعة ما نقلنا البيت ده من أسبوع فتحت فلقيت راجل سنه من سني واقف على الباب في أدب جم وخافض بصره في الأرض عرفني على نفسه أنا جارك وأخوك حسن ومد إيده سلمت عليه أدركت من اللكنة إنه سوري رغم إنه قال الكلام باللهجة المصرية..
يا ريت تشرفنا أخي بكرة إنت وأسرتك الكريمة على الفطور..
لسة هعتذر وهشكره قاطعني وقالي أعتبر عزومته طلب لتوثيق صلة الجيرة فما قدرتش غير إني أقبلها.. دلني على شقته اللي في وش شقتنا خبط لزق كنت عارف طبعا وبشوفه أحيانا وأنا راجع من الشغل لكن ما ركزتش في تفاصيل عنه..
قلت للمدام على العزومة فقالتلي إنها قابلت مراته على السلم مرتين وكانت ست ذوق وبشوشة وعندها بنت جميلة جدا ما شاء الله ما تتخيرش عن بناتنا..
تاني يوم قبل أدان المغرب بربع ساعة كان بيضرب الجرس بأدب خرجنا سبقنا على بيته استقبلنا بحفاوة وقابلتنا زوجته وبنته بابتسامة واسعة وسلمت على المدام والبنات بالقبلات..
كانت المائدة عامرة مفيهاش موضع فاضي..
قدملنا مع أذان المغرب تمر باللبن.. بعد ما نأنأنا التمر قال بدنا نكسر السفرة يا جماعة فهمت قصده لكن خفت للبنات يطبقوا الكلام حرفيا فبصتلهم لقيتهم أفطن مني.. كانت السفرة عليها فضلة خيرك محشي ورق عنب على الطريقة المصرية كبة مشوية ودي ضفتها لقايمة المأكولات اللي هشتهيها في الجنة إن شاء الله وحاجة آخر منجهة اسمها شاكرية بالدجاج وشاكرية باللحمة جنبها أطباق رز بالشعرية كأني بتعرف على الصنف لأول مرة علاوة على هبر اللحمة المشوية الصافية وأطباق الشوربة والفتة ناهيك عن المقبلات بابا غنوج وطرشي مصري وسلطة الفتوش اللي عجبت المدام جدا وما قدرتش تستنى لما نخلص أكل عشان تبدي إعجابها بيها بالذات..
بعد ما شبعنا لقينا المدام تاج بتقدملنا عصير قمر الدين