إحنا زعلانين.. أنا والمدام والبنتين
مضاف عليه مكعبات تلج حلفنا إن مفيش مكان فاضي لبق ميه حتى فضحك الأستاذ حسن وقال وتزعلوا الشاعر
رديت شاعر مين
قالت الحلوة الصغيرة حلا وهي بتقلد نبرة صوت والدها
في القلب خلوة لا يملؤها إلا الحلوى..
وكانت بالفعل مدام تاج جاية من المطبخ بصينية مشحونة على آخرها بالحلويات اكتفيت بحتة قطايف ومسكت بطني فابتسم حسن وقال بالمصري ماشي.. الجايات كتير
خرجنا أنا وهو نصلي التراويح في جامع قريب وسبنا المدامات والبنات يتعرفوا على بعض أكتر.. رجعنا لقيناهم سمنة على عسل كأنهم يعرفوا بعض من سنين جادت مراتي العزيزة ببعض ما تملك من نوادرها فكانت مدام تاج بتضحك بملء فمها وبتطق بكفها على كف عزيزتي بينما هناك مناكفة ورفع حواجب بين حلا وفاطمة حلتها بعقلانية وذكاء بنتي إيمان الحيلة اللي واخدة مني الكثير بنت أبوها زي ما بتناديها مامتها..
تركناهم على وعد بتناول الفطار بكرة في بيتنا..
لما رجعنا شقتنا فضلت مراتي تتكلم طول الليل عن عذوبة وبراءة مدام تاج وفي نفس الوقت كانت مكفية على التليفون تبحث عن سر طعامة الفتوش.. الحقيقة ما كانش فيه مكان في أجهزتنا الهضمية يساع السحور فاكتفينا بعلبة زبادي لكل واحد وقالتلي أفكر معاها في عزومة بكرة..
نامي يا حبيبتي الصباح رباح..
لأ ده من النجمة هتنزل رجلك على رجلي .. إنت مش مأجز بكرة كمان
ننزل فين أنا مأجز عشان أنام.. خدي إيمان معاكي وأهو بالمرة تعلميها..
لأ بطل غلبة عشان هتنزل معايا كده كده مين اللي هيشيل التسويقة
ما أحبش أنام ساعتين وأقوم مقريف بقية اليوم أنا أخلص الحدوتة دي كلها وأرجع أنام للمغرب أروق.. فضلت صاحي لحد ما البنات راحوا المدرسة ونزلنا لفينا لفة معتبرة على الإسواق رجعنا منها محملين بست إجواز حمام بلدي ودكر بط مسكوفي متزغط من اللي قلبك يحبه وتلاتة كيلو لحمة بتلو خالية من الشغت وجلاش ولحمة مفرومة وكرنبة وورق عنب وكوسة وبتنجان وفرختين شامورت وبشاميل وكنافة وتمر هندي وتوابل وبعضشي خضار على فاكهة.. وكل ما أقول خلاص هانت تفتكر حاجة ما جبنهاش وأنا عمال أفكر في طريقة آخد بيها سلفة من الشغل أكمل بيها الشهر..
ومع أدان المغرب كانوا الأسرتين متجمعين على سفرة مصرية صرفة أعدتها طباخة بريمو لا يعلى على نفسها شاربة أصول الصنعة وتعرف الكفت في شئون المطبخ..
تركنا المدامات مع بعض كالعادة وبعد التراويح قلت لحسن أنا نفسي هفاني على شيشة تعالى نقعد على أي قهوة قالي
لا بلا قهوة هدوقك شيشة أصفهاني هتدعيلي بعدها..
أخاف..
مش حامية يا عم..
لا لا مش القصد.. بص يا حسن ياخويا إنت ما بقتش غريب وبينا عيش وملح وفتوش أنا بشرب المعسل سړقة من ورا المدام.. خلينا ع القهوة أضمن..
الأصفهاني مو معسل.. هاد تمباك.
إنت بتنكت
فكرك يعني هيفرق معاها..
يا عم خلي قلبك جامد.. ونظر حوله وهمس أنا كمان بدخن بدون علم أم حلا خلينا نعفر أخي ونروق على صدورنا وهم مشغولين عنا في بيتك.. ما حدا راح يحس علينا إلا بقى لو على حظنا كانوا قاعدين ع البلكون.. بس قل لي بتعرف تلعب بلايستيشن
يا باشا إنت جيت لي في حتتي.. ما تندمش بس ع البق ده..
شرف شرف خلينا نشوف..
وطلعت الشيشة الأصفهاني ألذ من معسلات القص والسلوم.. وطلع حسن دقرم بلايستيشن رغم إنه مالوش في تشجيع الكورة وما يبانش عليه وهو شبه مدرسين الجغرافيا أصلا وبقى طقس يومي.. نصلي التراويح سوا ونستنى شوية على ما يكونوا المدامات زاروا بعض إذا ما كناش فاطرين سوا ونطلع نطرقع حجرين أصفهاني ونلعب ماتشين بلايستيشن ونرغي لحد معاد السحور.. صار بير أسراري وكذلك أنا كلمني عن حياته في الشام وعن عيلته وأحلامه وما تحقق منها وكلمته لقطت مراتي وبناتي من حلا ومامتها كلمات شامية كتير وأمثال شعبية وكذلك المدام تاج وحلا بقوا مصريين بربنط.. وانكبوا معا على نقرشة دواير الكحك ولف عجينة البسكوت في المكنة..
نسينا إن كان عندنا مشكلة قبل دخول الشهر الكريم.. لو تسأل الواحدة فيهم دلوقتي عايزين ترجعوا رمضان القديم ولا.... قبل ما تكمل السؤال هيقولوا لا هم مبسوطين مع تاج وحلا..
وتوثقت الجيرة وبقت صداقة وأخوة..
