زعلنا من بعض كتير
زعلنا من بعض كتير عادي لكن الزعلة دي كانت تقيلة جاية بعد تراكمات زي ما وصفتهالي علينا صوتنا وسمعنا بعض كلام ما يصحش انحمقنا لكرامتنا بعد ما كانت مشتركة كرامتها هي كرامتي دخلنا في حسبة إنت وأنا خدت البنت وسابت البيت وطلبت الطلاق فاتوني بطولي بين أربع حيطان..
أول ليلة قلت لنفسي بشوقها وهي اللي اختارت طلعت سجايري وعملت مج نسكافيه وشغلت روتانا كلاسيك وعملت فيها ابن بارم ديله اللي يدوس على مشاعره وذكرياته لأجل كرامته أم كلثوم كانت بتغني هذه ليلتي عند كوبليه بعد حين يبدل الحب دارا والعصافير تهجر الأوكارا قفلت التليفزيون وخرجت في البلكونة هي اللي اختارت بخاطرها بقى.. خلي العند ينفعها لطشني الهوا نمت مكاني حلمت بيها! ساعة ما كنا بنزعل أيام الخطوبة ونخرب الدنيا وتحلف وأحلف وفي الآخر نتصالح بمجرد ما تقول ألو حتى لو ألقت عليا العتاب واللوم صوتها كان بيدوب أي حاجة بيغربل أي زعل ويرجعلنا الحب صافي نقي من أي عكارة فيتحول اللوم لبحبك ونبرة الصوت المتحفزة تهدى وتبقى بقدرة قادر أرق من مناغية الطفل لو تسمع الكلام عمياني تحلف وإنت مطمن إن اللي بتتكلم ابتسامتها مفرودة بطول وعرض الوش..
حلمت بمقتطفات من الأيام دي صحيت من لطشة هوا برضو بس بقلب أضعف من ذلك الجامد اللي كان واخد في وشه ومحموق أوي أول ليلة ما نمتش فضلت للصبح أقلب في دفاتري القديمة دفاترنا رسايل الواتساب أكتر بكتير من إني أراجعها كلها مش بس عشان الكم هائل لا الجملة الواحدة وراها ذكرى والذكرى بتجر ذكرى لما قالت كنت مبسوطة أوي النهارده افتكرت اليوم ده بسهولة ده ليلة ما حضنتها أول مرة في حفلة تخرجها ساعتها ارتبكنا افتكرنا إننا ما كتبناش الكتاب والأهل حوالينا! اتكسفنا لكن في غمرة الفرحة حاجات
