زعلنا من بعض كتير

كتير بتعدي فضل طعم الحضن مستحوذ على روحي لحد أول حضڼ في النور! فضلت أغطس وأغطس في بحر تاريخنا سوا أغنية وغلاوتك بتاعة عمرو دياب أول أغنية بعتهالها صورتي لما اټجننت وقررت أقص شعري وأحلق دقني على سبيل التجديد ساعتها عملت وشي ستيكر تريقة طبعا وكل ما تتغاظ تبعتهولي ليلة ما عكت في امتحان وقلتلها بكل ثقة إنها هتقفل الفاينال فقالتلي اتنيل فاتنيلت وقفلت يوم ما صحيت من النوم فجأة وقررت تقولي من غير مناسبة إنها بتحبني خالص كانت تحب أنا اللي أبادر دايما وأقولهالها فترد بكسوف بنفس الصوت المبتسم وإنت برضو من ذكريات الخطوبة لحد رسايل هات لبن وزبادي وإنت راجع البامبرز خلص عايزة أروح لماما لحد الخناقة! وقفت في نص الطريق اللي مشيناه سوا خطوة خطوة كل السبل تؤدي إليها تملكني ما هو أقوى بكتير من الحنين..
متخيل إني هسردلك اللي حصلي بعد الليلة الأولى ليلة ليلة لحد ما الميه رجعت لمجاريها وكل شيء بقى ألسطة.. لا هي الليلة الأولى بس وتاني يوم من الصبح كنت واقف على عتبة بيتهم انهالت على دماغي بالعتاب واللوم أعنف من أيام الخطوبة صحيح لكن ملامحها كانت بتقسم بالله إنها بتحبني تقاطيعها البريئة بتناديني..
ببساطة سدت الطريق على أي تعقيدات لقتني بتلقائية ببوس دماغها..
بالليل كنا قاعدين سوا في البلكونة والكل نيام والشارع غارق في الظلام والهدوء طاغي.. قطعت السكون بعمرو دياب
وغلاوتك وحلاوتك والشوق اللي مالوهش حدود
بصراحة بكل صراحة أنا مغرم بعينيكي السود..
قلبي المفتون مجنوون بيكي
يا أول غنوة بغنيكي
من قلبي لقلبك طوالي
وادي شوقي الهايم حواليكي..
وتحولت ذكريات وأحلام ليلة إمبارح لواقع لنفحة من الجنة الموعودة.. تلاشى العالم من حولنا وصارت المسافة صفر والروحين روح يعني عادت الأمور لوضعها الصحيح..