اتولدت في ساعة غفلة
وائل كان بيقول على نفسه دايما أنا اتولدت في ساعة غفلة بعدين يستغفر ربنا بسرعة.. جه غلطة أب بيتجوز كتير بس مثبت الزوجتين اللي عنده منهم ذريته وعزوته.. تاجر ميسور يحتكم على أملاك وأطنان معيشاه في أمان تام فعنده رفاهية تبديد بعض الفلوس على جوازات لدماغه ومزاجه بس.. وكيفه كان دايما حادف على بنات في عمر الورد.. أم وائل كانت واحدة منهم بنت لونة وفرعة شافها واقفة أدام بوابة الثانوي التجاري اللي في وش محل من محلاته عششت في دماغه جاب قرارها وطلع على أبوها رمى بياضه اللي زغلل العيون وتمت الجوازة بسرعة وفاجئها بعد ما تمت إنه مش عايز يخلف دلوقتي ما كانتش تعرف اللي بيدور في دماغه واللي بيعمله مع بنات الناس اللي زيها لما ياخد كيفه منها أربعة وعشرين قيراط هيطلقها ويسيبلها شقة وقرشين في البنك وبكده هينام وضميره مرتاح..
لكن البنت كانت ساذجة وعيلة لدرجة إنها خالفت الاتفاق بالسهو وحملت في وائل.. كل اللي ضايق جوزها اللي يكبرها بأكتر من أربعين سنة إنها ورطت ضميره كان بيضحك على نفسه طول الوقت ومفهم حاله إنه مش ظالم طالما بيسيب البنت في عزها من غير ما يدبسها في عيل يوقف سوقها وطالما بيعوضها بشقة ملك وفلوس.. لا يمكن وهو على عتبة الستين وعنده ولاد كلهم في الشرطة والقضاء وبنات بشهادات عليا محترمة إنه يجيبلهم ڤضيحة..
استبدل بدهب المعز اللي كان بيستخدمه طول الوقت للإغراء سيفه.. لجأ للټهديد يا بنت الناس أنا راجل أعرف ربنا هصرف عليكي وعلى اللي في بطنك لله بس مع إنك ما تستاهليش إنتي اللي خنتي الاتفاق.. لكن لو دماغك وزتك وفكرتي بس تفتحي بقك هعمل وأخلي وأسوي.....
اتولد وائل في شقة أبهة اضطرت أمه تبيعها وهو في أولى ابتدائي لأن اللي كان بيصرف عليهم من ورا ستار ماټ.. فكرت كتير تروح تطالب بورث ابنها لكن الخۏف منعها.. اللي عارف القصة من أولها لآخرها جار قديم كان بيحبها وهي تلميذة ومستنيها لما تخلص اتجوزها وقرر يربي ابنها معاها وبالفعل رباه مع إخواته من الأم اللي أنجبتهم بعد كده كان بيبالغ في تدليل وائل أكتر منهم حتى يدفع عن نفسه تهمة زوج الأم التصرف ده خلى وائل طول الوقت حاسس إنه يتيم وغريب عن البيت لو اتعامل عادي زيهم كان صدق إنه فعلا بمثابة أب..
كبر وائل زي الضيف في البيت منعزل دايما بيهرب للمذاكرة والقراءة دخل كلية الطب ساب المدينة الإقليمية اللي عايش فيها وطلع على القاهرة أول مرة يتنفس بحرية رغم إن جوز أمه فعلا راجل طيب وعمره ما ضيقها عليه حتى في الجامعة تكفل بمصاريفه لكن وائل ما كملش جامعة!
وهو في سنة أولى قامت الثورة تلو الثورة
