8 سنين جواز بدون فرحة

وضوح الشمس الأدوية دي محتاجة تتجرب على أكبر عدد من البشر وبما إن الرقابة في أوروبا وآسيا شديدة فمفيش أدامهم غير البلاد العربية قاله إنه جرب المنتجات دي في سوريا وكان لها أثر إيجابي وكسب من ورا صديقه صاحب شركة الأدوية في خبطة واحدة اتنين مليون دولار.. طبعا سامر ما ارتحش أكتر لما قال التفاصيل وحس إنه هيتورط ورطة كبيرة جدا فقاله كلام على شاكلة ربنا يسهل وإن شاء الله ما اداهوش عقاد نافع يعني وتاني يوم كان نزل مصر..
لما واجه مراته الدكتورة نهى بكل اللي حصل وحكى لها العرض الأخير على أساس إنه حجة كويسة لقرار الرجوع ما عرفتش ترد! المرة دي عداه العيب..
قالتله
حصل خير أنا تعبت من الوحدة ومحتاجاك جنبي أوي.. ما عنديش مانع ترجع لمشروع العطور تاني بس تفضل جنبي عندي شرط وحيد ما تقولش لحد خالص إنك سبت الهندسة..
ده أسعد يوم مر عليهم من يوم ما اتجوزوا بليل اكتشف إنها كانت وحشاه أوي في اليوم ده انزرعت البذرة التالتة..
اشتغل في العطور والأشيا بقت معدن والحياة بينهم كانت وردي ومرت السنين لحد ما عدى على جوازهم تمن سنين وبقى عندهم بدل العيل تلاتة.. كل حاجة بينهم سمنة على عسل لحد ما صحيوا في فجرية على قرطة من الملثمين واقفين بالسلاح على راسهم في أوضة النوم.. خدوها من جنبه وانصرفوا وهو مذهول ما بيحطش منطق مش فاهم أي حاجة!
في اليوم التالي كانت كل المواقع الصحفية والبرامج والسوشال ميديا بتتكلم عن طبيبة بتحقن مرضاها مواد كيميائية ما بيظهرش مفعولها إلا على المدى البعيد أعراضها متباينة ما بين الذهان الجنون والفشل الكبدي والكلوي وتشكيلة متنوعة من البلاوي الزرقا.. كانت الطبية المدعوة دكتورة نهى عبد المجيد بتسافر كتير إلى مؤتمرات طبية خارج مصر وتعود بالمواد الكيميائية معبأة في علب دواء عادية محدش بيشك في أمرها مختومة بأختام شركات عالمية كهدايا مجانية لحضور المؤتمرات..
في لحظات انشغاله في تجميع القرش على القرش تواصلت مع صديقه الشامي أو هكذا كانت جنسيته المعلنة وبدأت الصفقة.. فرح بيها جدا وحكى لها إن هو اللي اتسبب في فصل جوزها من الشركة علشان يشغله معاه لكنه رفض العز والأبهة.. اكتشفوا إن لها في بنوك مختلفة ثروة تتخطى العشرة مليون دولار غير الأراضي والعقارات اللي تملكها بطرق ملتوية..
لأول مرة من ٨ سنين ياخد قرار الطلاق بجدية من غير أي تأنيب ذاتي حس إنه اتحرر من قيود كانت مكتفة كل حتة فيه..
وهو راجع بعد ما أنهى كل شيء غيابيا قابله في الطريق مجموعة من الشبان بطبل وزمامير وأعلام فرمل بكل قوته واستنى لما الطريق فضي تماما وساعتها انتابته كريزة ضحك هيستيرية قلبت پبكاء أقرب لبكاء الأطفال..